Vivo V60 Lite يصل الأسواق المصرية بنسختين 4G و5G، السر في المعالج والبطارية!
أعلنت شركة فيفو عن طرح هاتفها الجديد Vivo V60 Lite في السوق المصري رسميًا، بعد نجاح سلسلة الـV السابقة، وخصوصًا الـV50 Lite. الهاتف الجديد بيكمّل المسيرة بتصميم أنيق وأداء محسّن، وبيتوفر بنسختين: 4G و5G علشان يناسب كل فئات المستخدمين في السوق المحلي.
التصميم والشاشة Vivo V60 Lite 5G
- التصميم والخامات: الهاتف بييجي بخامات بلاستيكية بالكامل، لكنه بيتميز بخفة الوزن حوالي 194 جرام، وأبعاده المتناسقة 163.8×76.3×7.6 مم. فيفو ما اكتفتش بالشكل فقط، لكنها ضمنت للهاتف مقاومة للماء والغبار بشهادة IP65، وكمان مقاومة للصدمات بمعيار MIL-STD-810H العسكري، ودي نقطة بتخليه أقوى من منافسينه في نفس الفئة.
- الشاشة: Vivo V60 Lite جاي بشاشة AMOLED ضخمة مقاس 6.77 بوصة بدقة FHD+ (1080×2392) وكثافة 387 بيكسل لكل بوصة، مع دعم معدل تحديث 120 هيرتز وتقنية HDR10+ وسطوع يوصل لـ 1800 شمعة. وده بيخليه مناسب جدًا لمشاهدة الفيديوهات والألعاب بألوان واقعية وتفاصيل دقيقة حتى تحت ضوء الشمس المباشر.
المعالج والأداء
- نسخة 4G بتعتمد على Snapdragon 685 من كوالكوم، ثماني النواة بمعمارية 6 نانومتر، ومعالج رسومي Adreno 610.
- نسخة 5G فيها معالج أقوى Dimensity 7360 Turbo من ميدياتك بدقة تصنيع 4 نانومتر ومعالج رسومي Mali-G615.
الاتنين بيقدموا أداء سلس جدًا سواء في التصفح أو الألعاب، خصوصًا مع واجهة Funtouch OS 15 المبنية على Android 15 الأحدث.
الذاكرة والتخزين
- الهاتف بييجي بمساحة تخزين 256 جيجا مع 8 أو 12 جيجا رام.
- نسخة الـ5G بتتميز بذاكرة تخزين UFS 3.1 الأسرع، في حين إن نسخة الـ4G بتيجي بـUFS 2.2، والرامات من نوع LPDDR4x، وده معناه سرعة في الفتح والتنقل بين التطبيقات.
الكاميرات
- الكاميرا الخلفية الرئيسية بدقة 50 ميجا بيكسل بمستشعر Sony IMX882 وعدسة F/1.8، ومعاها كاميرا تانية 8 ميجا بيكسل بزاوية واسعة.
- الكاميرات بتدعم فلاش Aura Light الفريد من فيفو، وتصوير فيديوهات بجودة 4K@30fps في نسخة الـ5G و1080p@30fps في نسخة الـ4G.
- أما الكاميرا الأمامية فهي 32 ميجا بيكسل بفتحة عدسة F/2.45 وبتدعم تصوير فيديوهات Full HD بوضوح ممتاز.
البطارية والشحن
من أبرز نقاط قوة الهاتف هي البطارية. فيفو استخدمت بطارية Silicon Carbon بسعة 6500 مللي أمبير، بتدعم شحن سريع 90 وات، وكمان شحن عكسي 6 وات. وده معناه إنك تقدر تشحن سماعتك أو أي جهاز صغير من خلاله، وده بيتم عبر منفذ USB Type-C.
الصوت والمزايا الإضافية
- الهاتف بيقدم تجربة صوتية مميزة مع سماعات Stereo مزدوجة، وبيحتوي على مستشعر بصمة مدمج بالشاشة، ودعم NFC، وخاصية فتح القفل بالوجه.
- لكن الجدير بالذكر إنه مافيهوش منفذ سماعات 3.5 مم، وده بقى توجه أغلب الشركات الحديثة.
الأسعار والألوان
الهاتف متوفر في لونين جذابين: الأسود الكلاسيكي والأزرق الفاتح العصري. أما الأسعار في السوق المصري فجت كالآتي:
- Vivo V60 Lite 4G (8 جيجا رام + 256 جيجا تخزين): 12990 جنيه مصري.
- Vivo V60 Lite 5G (8 جيجا رام + 256 جيجا تخزين): 14990 جنيه مصري.
- Vivo V60 Lite 5G (12 جيجا رام + 256 جيجا تخزين): 16990 جنيه مصري.
